Damchhung lung in tang turin Ram Rahim hrem

Dera Sacha Sauda sakhaw hruaitu huhang nei lian tak Gurmeet Ram Rahim chu journalist Ram Chander Chhatrapati thah thubuaiah thiam loh chantir a ni a, damchhung lung in tang tura hrem a ni. 

Ram Rahim rual hian a thurualpui Kuldeep Singh, Nirmal Singh leh Krishan Lal-te pawh thiam loh chantir an ni a, anni pawh hi Rs 50,000 ve ve chawi tur leh damchhung lung in tang tura hrem an ni bawk.

Kum 51 mi, Ram Rahim hi hmeichhe pawngsual thubuai nei lai a ni a, hemi case-ah pawh hian kum 20 chhung lung in tang tura hrem a lo ni tawh a ni. Journalist Chhatrapati thihna chungchang thubuai ngaihtuah a nih lai pawh hian amah zuitu te'n buaina an chhawhchhuah an hlauh avangin video-conferencing hmangin a thubuai ngaihtuah lai hian a in lan a ni. Kum 2017-a Ram Rahim man a nih khan buaina nasa tak chhuakin, mi 38-in nunna chanin mi 200 chuang chu a inhliam phah hial a nih kha. 

Chhatrapati hian a chanchinbu 'Poora Sach'-ah kum 2002 Ocotber thla khan Ram Rahim-a'n hmunpui a neihna hmun Sirsa-ah hmeichhe tam tak a khawihchhiat thu a ziak a, hemi hnu lawk hian Ram Rahim zuitute chuan Chhatrapati hi an kaphlum zui nghal a ni.