Supreme Court-in Judge thar pahnih nei

India rama court sang ber Supreme Court chuan judge thar pahnih a neih belh a, Karnataka High Court Justice Dinesh Maheshwari leh Delhi High Court Chief Justice Justice Sanjiv Khanna-te chu Chief Justice of India Ranjan Gogoi chuan rinawmna thu tiam tirin a lalut.

Justice Maheshwari leh Justice Khanna-te lakluh an nih avang hian Supreme Court Judge nilai chu 28 an ni ta a, Supreme Court-ah hian Judge 31 awm tur a ni thung.

Judge thar pahnih ruat an nih danah hian sawi neuh neuh a tam hle a, a bik takin Justice Khanna hian a aia senior zawk Justice Pradeep Nandrajog a kaisan khalh avangin Jugde thar ruat a nih dan hian rinhleh a kai zual hle. Chief Justice of India hlui RM Lodha chuan Judge ruat tura duan committee-in Justice Nandrajog an enkan chu mak a tih thu sawiin langtlang taka engkim kalpui ni thei se a duh thu a sawi a ni.