CBI aṭangin Rakesh Asthana sawnchhuak ve leh

Prime Minister Narendra Modi-a kaihhruai selection committee-in Central Bureau of Investigation (CBI) Alok Verma a sawnchhuah hnuah, Ningani khan CBI Special  Director Rakesh Asthana pawh a sawnchhuak ve leh. 

CBI Director aṭanga ban Alok Verma leh Special Director Rakesh Asthana-te hi thamna laah inpuh tawnin an inkar boruak a chhe hle a, hei vang hian sawnchhuah an nih hma pawh sorkar chuan chawlh a lak luihtir ve ve a ni. Alok Verma hian chawlh tir a nih chungchangah Supreme Court-ah a zualko a, court chuan a dinhmun ngaiah a dahlet tir a, mahse CBI Director-a dah leh a nih hnu lawkah PM kaihhruai committee chuan a sawnchhuak leh  nghal a ni. CBI Director thar tur hi ruat a la ni lo a, January 24 hian committee chuan a ruat ang. 

Asthana rual hian agency hotu atana rinkai zinga mi, Joint Director AK Sharma, DIG MK Sinha leh SP Jayant Naiknavare-te pawh CBI aṭang hian sawnchhuah an ni tel bawk. Asthana hi Bureau of  Civil Aviation Security chief atana ruat a ni a, Sharma hi CRPF-ah Additional DG-ah leh, Sinha hi  Bureau of Police Research and Development-ah dah a ni bawk. 

1984 batch IPS officer Asthana hi nikuma Verma nen an kar boruak a chhiat chhoh hma khan CBI Director-a Verma thlak tura rinkai ber a ni. Mahse nikum October 15 khan hotu pahnihte hian inkara boruak ṭha lo hi mipui hriatah a darh a, Verma hian Hyderabad sumdawng Sathish Ana Babu lak aṭanga thamna cheng vaibelchhe thum laah puhin thubuai a thehlut zui a ni. Hemi hma hian Asthana hian thubuai pawimawh tak chhuinaah Verma hi inrawlhah puhin, Sana hnen aṭanga thamna cheng vaibelchhe hnih laa puhin, sorkar-ah ziakin complaint a thehlut a ni. An inpuh tawnna chungchang hi CBI chuan a chhui zui nghal a ni.