Ni 39 hnuah J&K-a khuahkhirhna hlip

Jammu and Kashmir tana special status Article 370, August 5-a paih a nih hnu, ni 39 zet a liam hnuah nimin khan khuahkhirhna hrang hrang hlih a ni.

Khawlaia chhuah khapna chu J&K pumah hlih a ni a, landline phone-te pawh tihnun a ni leh tawh bawk. J&K Department of Information and Public Relations chuan nimin khan thuchhuah siamin area zawng zawngah khuahkhirhna hlih a ni a, traffic pawh a tam leh ṭan tawh tih an tarlang. Landline pangngai takin hman leh theih a ni tawh a, Kupwara leh Handwara-ahte pawh mobile phone hman leh theih a ni tawh tih an tarlang.

Hazratbal area-ah erawh khuahkhirhna tlem azawng kalpui a la ni thung tih official-te chuan sawiin, congregational prayers avangin venthawn thilah hei hi la kalpui a nih thu an tarlang bawk. Hazratbal-ah hian khuahkhirhna siam thar a ni leh a, mahse hei hian khaw pumpui huam loin police station panga huam chin chiah a huam thung niin an sawi.

August 5 aṭang khan Srinagar leh khawpui tam takah chuan khuahkirhna nasa tak kalpui a ni a, kawngpuiah barbed wires-te dah a ni bakah dawrte pawh khar a ni. Internet tihtawp a ni a, phone line cut a ni bawk a, tualchhung mite pawhin an chhungte hmundanga awm an bepawp thei lo hial.

Sorkar chuan muangchangin khuahkirhna hi a hlip tam tial tial a, nimin kha Hazratbal area tih lohah chuan khuahkhirhna hi an hlip vek tawh niin sorkar chuan a tarlang a ni.

Sorkarin khuahkhirhna hlih vek a nih tawh thu puang mah se Kishtwar khuaah erawh PDP dis­trict president Sheik Nasir perso­nal security office kut aṭanga rifle laksak a nih avangin curfew an puang. Rifle laksaktute hi tute nge an nih hriat a la ni lo a, an chhui zui mek a ni.