Delhi-ah odd-even scheme hmang leh dawn
Delhi khawpuia motor tawt lutuk leh air pollution sang zel tihziaawmna tur peng pakhata motor number kawpkim leh kawpkim lo inthlanchhawk ni, odd-even scheme chu November 4 -15 chhung hian hman a ni dawn.
Chief minister Arvind Kejriwal chuan thlai ro hal hun lai, November 4-15 chhung hian odd-even scheme hi hman a ni leh dawn tih a puang. A hmaa he scheme an lo kalpui tawh aṭang khan pollution level pawh a tihziaawm phah tih a sawi bawk.
State sorkar chuan khawpui chhunga air pollution level sang zel laka invenna tura hmalakna tur point pasarih pawh a puang nghal. Heng zingah hian mipuite hman tura a thlawna hmai tuamna, mask sem te, thingṭiak tam zawk phun te, thlasik laia thingro hal nasa lutuk veng tura volunteer dahte a tel.
Kejriwal chuan nimina press conference a neihah scheme kalpui tur hi a puang a, odd-even scheme chu emergency-a hman chi leh, hun rei tak hman reng theih a nih loh thu a sawi. CM chuan thlai ro hal avanga air pollution nasa tak insiam ṭhin tihtawp a nih theihna tura kawng dan ngaihtuah turin Delhi sorkar chuan a ṭhenawm, Haryana, Punjab leh Uttar Pradesh state-te pawh a thawhpui zel tur thu a sawi.
Odd-even scheme hi Delhi sorkar hian ṭum hnih a lo kalpui tawh a, hemi ṭum hian hmeichhia, VIP leh two-wheeler te huam tel tir an ni lo. November thlaa scheme an kalpui leh turah hian ngaihhnathiamna pek chin a nei leh dawn em tih sawichian a la ni lo a, CM chuan scheme kalpui a nih dan tur kimchang chu ni rei loteah la sawifiah a ni dawn tih a puang.
Supreme Court thupek anga Diwali lawmnaa halpuah hal lo turin Delhi sorkar chuan a ngen bawk. Hemi atan hian campaign pawh kalpui thuai a ni ang, tiin Kejriwal chuan a sawi. Sorkar chuan Delhi khawpuia chengten an huhoa an lawmna tur, lazer show a buatsaih dawn a ni, a ti.
World Health Organisation-in khawvela khawpui boruak bawlhhlawh zualte a tehnaah Delhi hi kum eng emaw chen chu a sang berah a lo awm tawh a, motor tam vang te, factory-ten meikhu an tihchhuah te, insakna hmuna bawlhhlawlh khu leh, bawlhhlawh leh thlai ro hal khuten khawpui boruak hi a tibawhlhlawh nasa hle. Kum thum kal ta chhung khan air pollution level hi 25 dawnin tlahniam mah se, khawpui boruak thianghlim awm tur chuan 65% vela a tlakhniam a ngai niin zirchianna chuan a tarlang.