Donald Trump a lo thleng dawn

US president Donald Trump leh a nupui, First Lady Melania Trump-te chuan vawiin hian India an rawn thleng dawn a, ni hnih an cham ang. 

Prime minister Narendra Modi chuan nimin khan twitter-ah Donald Trump lo lawmna thu a sawi der tawh. Gujarat chief minister Vijay Rupani-a'n Gujarat-in Trump a lo lawmna video a tweet chu retweet-in India chuan a nghakhlel tawh tih leh, Ahmedabad-a programme chhinchhiah tlak taka a telpui tur chu chawimawina a nih thu a sawi tel bawk.

Vawiina Ahmedabad-a a Donald Trump programme tur hi Namaste Trump event tia sawi a ni a, Narendra Modi nen hian mi nuai khat chuang hmaah thu an sawi ang.

Khawvela cricket stadium lian ber Montera, Ahmedabad-a Sardar Patel Stadium-ah he hun hi an hmang dawn a ni. Gujarat Cricket Association vice president Parimal Nathwani chuan an stadium-a Trump-a'n thu a sawi tur chu a inchhuan  thu a sawi. 

Donald Trump hian Agra-a India rohlu, Taj Mahal a tlawh dawn a, hemi atan hian Uttar Pradesh sorkar chu a inpuahchah nasa hle. Kawngpui leh a chheh vel nasa taka tihfai a ni a, bangah Trump lawmna thuziak tam tak hmuh tur a awm tawh a, Taj Mahal hungna bangte pawh tihfai a ni bawk. 

Trump hian vawiin chawhnu hian Taj Mahal hi a tlawh dawn a, Namaste Trump event a hman zawhah a pan nghal dawn a ni.

Delhi pawh an inbuatsaih nasa hle a, Tulip leh dahlia hybrid rawng chi hrang hrang pot 15,000 zet chu US President leh Prime Minister-te inbiakna tur hmun, Hyderabad House-ah an dah. Delhi Police, US Secret Service leh agency hrang hrang­te chuan venhim hna hi an kalpui ang.

First Lady Melania Trump-in a tlawh tur, Delhi school pawh venhimna khauh tak hnuaiah a awm tawh. Hetihlai hian  Melania-i'n Delhi sorkar school a tlawhna turah hian Delhi chief minister Arvind Kejriwal leh deputy chief minister Manish Sisodia-te chu sawm an ni ve lo a, hei hian titi a ti tam hle.

Trump leh Modi inbiakna tur Hyderabad House  hi kum 92 kal ta khan sak zawh a ni tawh a, Nizam of Hyderabad hnuhnung ber Mir Osman Ali Khan tana sak a ni. India-in zalenna a neih hnu khan Nizam kutah awm tawh loin India sorkar kutah dah a ni a, ram dang mikhual pawimawh zualte meeting neihpuina hmun pawimawh tak atan hman a ni ṭhin.

Donald Trump leh Narendra Modi-te hian thil pawimawh hrang hrang an sawi dun dawn a, chung zingah chuan economy leh energy lama thawhdunna turte pawh a tel. 

l    US President hian sakhaw zalenna chungchang Modi hi a sawipui ang (Hei hian CAA leh Kashmir issue a huam rin a ni)

l    Energy chungchang hi thu khel tur pawimawh tak pakhat a nih hmel. US hi India rama energy thawnluttu pawimawh tak a nih avangin heihi topic pawimawh tura ngaih a ni.

l    Defence lama Indo-US thawhdunna chungchang leh, chak lehzuala thawhdunna tur an sawi ang.

l    Firfiak don letnaa thawhdunna chak zawk neih dan tur pawh an sawi dawn a, hemi kawngah hian Memorandum of Understanding (MoU) pawh an ziak mai thei.

l    Sumdawnna chungchang hi topic pawimawh ber pakhat a ni ang. Hemi kawngah hian inremna pawh an ziak mai thei niin media hrang hrang chuan an tarlang a ni.

Sardar Patel Stadium (Montera Stadium)

Mipui leng zat    :     1,10,000

Hming dang    :    Montera Stadium tia hriat lar a ni bawk

Neitu    :    Gujarat Cricket Association

Len zawng    :    162 yards x 170 yards

Sak ṭan kum    :    1982

Sakna atana senso    :    Rs vbc 800