PM-in Hunar Haat chhim turin mipuite sawm

New Delhi-a India Gate-a phaitual hnim ṭona tual zawla buatsaih, 'Hunar Haat' chu a tam thei ang berin chhim ve turin prime minister Narendra Modi chuan nimin khan mipuite a sawm.

Thla tina radio prog­ramme a hman ṭhin, 'Mann Ki Baat' vawi 62-na a hman­naah PM Modi chuan Hunar Haat a tlawh thu hi sawichhuakin, culture hrang hrang awmna India ram ropui zia pho lanna chu mipuiten tlawh ve fo se a duh thu a sawi. 

"Ram chhung hmun hrang hrangah fair leh exhibition te buatsaih a ni fo ṭhin. Hengte hi India ram hriatchianna tura tlawh fo ṭhin tur a ni," ati. 

Hunar Haat hi Union Ministry of Minority Affairs-in khawpui hrang hrang­ah a buatsaih ṭhin a, kut­themthiam ten India hnam thil leh rohlu an pho­chhuah ṭhin. Delhi-ah chuan February 13 aṭang khan neih ṭan kha niin, nimin khan a ṭiak ta a ni. Kum tin February thlaa neih a ni ziah bawk.