BJP vangin "Super emergency" thleng mek : Mamata Banerjee

West Bengal chief minister Mamata Banerjee chuan nimin khan kan dikna chanvo leh zalenna te, central-a sorkarna fung chelhtu BJP-in min rah beh sak avangin, kan ramah hian "Super emergency" a thleng mek tih a sawi.

"Indian Constitution a kan hmuh leh hriat angin, kan dikna, zalenna leh chanvo te kan humhalh theih nan, India mipuite chu kan in pumkhat a pawimawh a ni," tiin nimina International Day of Democracy niah Mamata chuan a Twitter-ah a tarlang.

Mamata chuan, "Vawiina kan hman International Day of Democracy avang hian kan Constitution hlutna hi hrechhuak thar leh ila, ram hruaitu hlui kalta te zahna avang tal paw'n, kan Constitution hi sorkar laipui hian a hlutna tihniam mawlh suh se," a ti. 

Sorkar laipuiin National Register of Citizens (NRC) ram pum huapa hman a rawt chu, state ṭhenkhatah hman ni tawh mah se West Bengal-ah chuan hman a ni ve dawn lo, tiin Mamata chuan a sawi. Assam-a NRC an kalpuia final list-a telve lo mi nuai 19 chuangte chu BJP chuan mipui ṭhenhran a duh vang, tiin Mamata chuan a puh a ni. NRC hi engtikahmah ka thlawp ngai lo ang, a ti bawk.

Uttar Pradesh BJP MLA Surendra Singh chuan NRC chu West Bengal-ah hman a nih dawn thu a sawi ve thung a, Mamta-in a vote hmuh hnem nan Bangladesh miho a hum duh a nih chuan, Bangladesh prime minister nih tumin politics khel law law rawh se, a ti.