Delhi-a CAA duh lohna lantir vangin Jaffrabad metro station khar a ni

Delhi hmarchhak lama awm Jaffrabad hmuna metro station-ah nimin khan mi 500 rual velin Citizenship Amendment Act (CAA) duh lohna lantirin nawrh an huaihawt a, hei vang hian Jaffrabad metro station chu khar rih a nih thu Delhi Metro Rail Corporation thuneitute chuan an sawi.

Nawrh huaihawtte zingah hian hmeichhia an tam ber nia sawi a ni. Kar kal ta Inrinni aṭang khan nawrh hi huaihawt leh ṭan a ni. Nawrh huaihawt a nih avang hian kal kawng dan a ni a, hei vang hian Jaffrabad aṭanga Seelampur, Maujpur leh Yamuna Vihar chu kaltlang theih a ni rih lo.

CAA duh lohna avanga nawrh huaihawtte hian 'aazadi' (freedom) tih hmangin au hla an nei tel a, sorkar laipuiin CAA a hnuh kir hma loh chuan nawrh hi huaihawt chhunzawm zel an la tum thu an tlang au pui bawk.

He thil tleng vang hian Jaffrabad leh a chhehvelah hian Delhi police lam pawhin ngawrh takin duty hna an thawh bakah, hmeichhe police-te chu sorkar chuan a dah nual bawk. Remna a awm theih nan Supreme Court chuan nawrh huaihawtte nena inbiak remna an neih theih nan nawrh huaihawtte be turin mi a ruat fel tawh bawk a ni.