A ṭul chuan keimah ngei J&K-ah ka kal ang : CJI

Chief justice of India (CJI) Ranjan Gogoi chuan Jammu and Kashmir-ah tualchhung mipuiten court-a thil thlen kawngah harsatna an nei nia sawi chungchang chu chhangin, a ṭul a nih chuan thil awmdan enfiah tura amah ngei kal a inhuam thu a sawi. 

CJI Gogoi chuan J&K High Court chief justice chu hemi chungchangah hian report pe turin a hrait­tir bawk a, he thil hi thil pawimawh, ngaih­thah mai chi a ni lo, a ti. Senior advocate Huzefa Ahmadi chuan Supreme Court-a petition a thehluhah, tuna J&K dinhmun tawn mekah chuan high court kal a harsat thu leh, hei vang hian child rights activist Enakshi Ganguly leh Shanta Sinha-te pawhin HC kal loin Supreme Court zawk an kal phah thu a sawi. 

Supreme Court-a petition thehluhah hian Article 370 tihtawp a nih hnuah, state chhungah naupangte chu dan loa hren an ni tih sawiin, an dikna chanvote palzut sak an ni tih tarlan a ni. Hemi rual hian peti­tion-ah vek hian Jammu and Kashmir High Court-a juvenile committee chungchang pawh a zawtfiah nghal bawk. 

Justice Gogoi chuan Jammu and Kashmir HC chief justice chu amah ngeiin biain, thil awmdan a zawtfiah dawn tih a sawi. Ahmadi chu a thil sawite chu thu dik lo a nih chuan, a nghawng let tuar a inpeih a ngai tih a hrilh nghal bawk a ni.