RSS tel lo chuan Hindustan hi a awm lo ang : Rajasthan BJP chief

Bharatiya Janata Party (BJP) Rajasthan unit president thar Satish Poonia chuan Pathianni khan India-ah democracy a la him thu sawiin, khawvel mithmuhah pawh mawi takin a la eng a ni, a ti.

Satish Poonia chuan Rashtriya Swayam­sevak Sangh (RSS) chu institution mai a ni lo a, ramchhung mai bakah khawvel huap pawha danglamna thlen thei 'revolution' a nih thu sawi­in a fak hle. 'RSS tel lo chuan Hindustan hi a awm lo ang' tia sawiin, democracy pawh humhim a la nih reng thu a sawi.

Congress party beih chhunzawm bawkin, 'history' hi thil thup reng theih a ni lo a, dahṭhat theih pawh a ni lo. Tunge ram ṭhendarh a, Mughal-te leh British-te tunge inremna siampui, Babri Masjid issue siam turin tuin nge Ram Mandir tichhia? tiin, hming sawilang si loin Congress chu a beih chhunzawm a ni.

Satish Poonia hi RSS grass root leader nia hriat a nih ṭhin bakah RSS hruaitu zinga member-te pawhin an duh ber zinga mi a ni. BJP tan member nuai 50 a lalut tling tawh a, BJP party general secretary pawh ṭum li lai lo ni tawh a ni bawk. Poonia hian nikuma boral ta Madanlal Saini thlakin Rajasthan BJP chief dinhmun hi a chelh a ni.