JNUSU-in Delhi High Court-ah thubuai theh lut
Delhi-a Jawaharlal Nehru University Students’ Union (JNUSU)-te chuan an hostel fee tihsan a ni chu duh loin Delhi High Court-ah thubuai an theh lut.
Court-a thubuai an ziah luhah hian court chu a thuneihna hmanga hostel fee a pangngai anga tihhniamsak leh turin an phut a ni. Heng bakah hian JNU-a thuneitute'n kumina semester thara zirlai in-register-te hnena late fee an chawitir chu sut turin an phut bawk.
Nikum October 28-a Inter Hostel Administration's (IHA)-in hostel manual an tihchhuah chu hostel fee tihsan, hostel hawn leh khar hun leh thawmhnaw hak dan tur chungchanga inthununnate ziahlan a nih vangin zirlaite chuan nasa takin an dodal a ni.
JNUSU president Aishe Ghosh, office bearer - Saket Moon, Satish Chandra Yadav leh Md Danish-te chuan court-ah hian thubuai hi Thawhlehni khan an theh lut.