Rajasthan-ah BSP MLA parukin Congress zawm

Rajasthan-a Bahujan Samaj Party (BSP) MLA paruk chuan nimin khan rorellai, Congress party an zawm. 

Rajasthan-ah hian November thlaah municipal inthlan neih a ni dawn a, BSP MLA-ten Congress an zawm leh tak avangin an dinhmun pawh an sawhnghet zual thei tura ngaih a ni. Party zawm thar MLA parukte nen Congress hian Assembly member 200 awmnaah member 106 a nei dawn ta a ni. 

BSP hotu, Mayawati chuan an party MLA parukin Congress party an zawm chungchangah Congress party chu na taka demin, rinngam an nih loh zia an tilang tiin a puh. "Congress sorkar chu pawn lam aṭangin beisei nei loa BSP-in a thlawp chunga hetiang thil an ti leh ta hi BSP phatsanna a ni," a ti. Congress party chuan anmahni eptu party te bei loin, anmahni thlawptu zawk an bei leh ṭhin a ni, tiin Mayawati chuan a sawi. 

Hetihlai hian BSP MLA-te chuan sorkar ngialnghet a awm theihna atan leh, an state hmasawnna turin Congress party-ah luh mai hi an rel ta tih an sawi. Chief minister Ashok Gehlot chu chief minister ṭha ber a ni a, Rajasthan tan a ni aia ṭha an awm thei lo tih sawiin, a hnathawh leh a policy-te chuan a hneh hle tih Congress zawm thar zinga mi, Rajendra Guda chuan a sawi. BSP MLA zawng zawngin Congress an zawm avang hian anti-defection law hnuaia hremna an pumpelh thei dawn a ni. 

Nikuma Rajasthan assembly inthlan neihah khan Congress party hian seat 100 lain, BJP-in seat 72 an la. Sorkar siam turin member 101 neih phak a ngai a, hei vang hian BSP member paruk leh independent MLA 12-te thlawpna nen Congress chuan sorkar an siam a ni. BSP MLA-ten Congress an zawm tak avangin, party malin sorkar pawh an siam zui thei tawh dawn a ni.