PM-in ram hrang hrang hruaitu 30 a hmu dawn

Prime minister Na­rendra Modi chu karleh hian New York-ah United Nations General Assembly hmang turin a zin dawn a, hemi pah hian India-Caribbean (CARICOM) island summit leh India–Pacific Islands Cooperation (FIPIC) summit hman­naah a tel nghal bawk ang. Hetah hian ram hrang hrang hruaitu 30 a hmu nghal dawn.

He hunah hian climate change chuangchang leh blue economy chung­changa India leh ram­dangte'n hmalakna ṭha zawk an kalpui theih dan tur leh, thawhdunna ṭha zawk an neih theih dan turte rel a ni ang. Caribbean Island summit neih turah hian India hi a vawikhat telna tur a ni. Caribbean Island member ramte hi 20 an ni a, chung zinga 15 te chu full member an nih bakah ram 5-te chu associate member an ni bawk.

CARICOM full mem­ber-te chu - Antigua and Barbuda, Bahamas, Barbados, Belize, Do­minica, Grenada, Gu­yana, Haiti, Jamaica, Montserrat, Saint Lucia, St Kitts and Nevis, St Vincent and the Gre­nadines, Suriname and Trinidad leh Tobago-te an ni. India hian Caribbean Island ramte nen hian thawdunna kawng hrang hrangah a kalpui mek a. September thla tir khan India sorkar chuan Hurricane Dorian avanga chhiat tawkte ṭanpuinan CARICOM member Bahamas hnenah $mtd 1 a pe a ni.

Kumina India–Pacific Islands Cooperation (FIPIC) summit neih tur hi a vawithumna tur a ni a, a hmasa ber atan kum 2014 khan Fiji-ah neih a ni a, 2015 khan Jaipur-a neih leh a ni bawk. FIPIC member 14-te chu - Cook Islands, Fiji, Kiribati, Marshall Islands, Micronesia, Nauru, Niue, Samoa, Solomon Islands, Palau, Papua New Guinea, Tonga, Tuvalu leh Vanuatu-te an ni. India chuan kumtinin heng Island ramte puihna atan USD 200,000 a pe ṭhin.