FM Nirmala Sitharaman-in Union Budget 2021-22 a pharh

Union finance minister Nirmala Sitharaman chuan nimina Parliament inkhawmah Union Budget 2021-2022 a pharh. 

Kumin budget hi paperless format hmanga pharh a ni a, Parliament member leh mipuite tan online-a en theih tura dah chhuah a ni. Finance minister hian union budget hi 'Made in India' tab aṭangin a chhiar a ni. 

Budget-ah hian Covid-19 hripui leng vanga economy tlahniam siamṭhatna tur pillar paruk thlurbing bik a nih thu minister chuan a sawi a, chungte chu -  Health and Well-Being, Physical and Financial capital and infrastructure, Inclusive Development for Aspirational India, Reinvigorating Human Capital, Innovation and R&D, Minimum Government and Maximum Governance-te an ni. 

Sorkar laipui scheme 'One Nation, One Ration Card' scheme chu state leh Union Territory 32-ah kalpui a ni tawh tih sawiin, mi vaibelchhe 69 in an chhawr tawh a ni, a ti. He scheme hmang hian khua leh tui dik takte chuan an ration chu khawi state-ah pawh an la thei a ni tiin, a bikin state danga inhlawhfaa awm ṭhinten an chhawr ṭangkai hle tih a sawi. He scheme la hmang lo state leh UT dangte pawhin an hman ve thuai tur thu a sawi bawk. 

Sorkar lapui chuan 2021-2022 health and well being budget-ah Rs vbc 2,23,846 dahin, budget hmasaa a sum dah aiin 137% in a tam zawk. 

Finance minister chuan healthcare sector-a centrally sponsored scheme thar a puang bawk. He scheme thar, 'PM Atmanirbhar Swasth Bharat Yojana' chu tlangzarh thuai a ni dawn tih sawiin, kum ruk chhung atan Rs vbc  64,180 dah a ni dawn. 

Minister chuan he scheme hi healthcare system thuam chak, hri leng thar hriatchhuah a, a damdawi siam a nih thuaina tur institution siamte a tum ber a ni dawn tih a sawi. Kum 2021-2022 atan Covid-19 vaccine leina turin Rs vbc 35,000 dah a ni a, a ṭul dan azirin fund hi dah belh a ni ang. 

Minister chuan India ram chhung ngeia siam, Covid-19 vaccine dang pahnih pawh a awm leh thuai dawn tih a sawi.

Budget tharah hian kum 75 chunglam, pension chauh ringte chu chhiah awltir an ni ang. 

Minister chuan India-in zalenna a neih champha vawi 75-na pualin, kum upa zawte harsatna chu an theih anga chhawk an tum tih a sawi. Pension leh interest income chauh ring tan chhiah awltir an ni dawn a ni. 

Kum 60-80 inkar tan kum khata Rs nuai thum hnuai lam lalut chin tan chhiah chawi a ngai lo a, Rs nuai 3-5 lalut tan 5%, Rs nuai 5 - Rs nuai 10 lalut tan  Rs 10,000 bakah Rs nuai 5 chunglam an sum lakluh aṭanga 20% an pek a ngai thung ang. 

Finance minister chuan petrol leh diesel-ah chhiah thar, Agricultural Infrastructure and Development cess lak a ni dawn tih a sawi. 

Agricultural cess hi petrol litre khatah Rs 2.5 leh diesel-ah Rs 4 zel lak a ni dawn a, mahse chhiah lakna thar hi siam ni mahse tuialhtheih mante hi a danglam phah dawn chuang lo a ni. Minister chuan chhiah lakna thar hi siam ni mah se, basic excise duty (BED) leh special additional excise duty (SAED) rate tihhniam a ni thung a, hei vang hian consumer-te tan an leina man hi a hma nen a danglam phah dawn lo tih a sawi. 

Agricultural cess hi alcohol, gold and silver bar, crude palm oil, crude soyaben, sunflower oil apple leh pea-ahte lak tel a ni dawn a, vawiin aṭangin hman ṭan nghal an ni ang. 

Sorkar chuan motor hlui leh upa zawkte hnawlna tur, voluntary vehicle scrappage policy a puang. 

He policy hnuaiah private vehicle tan kum 20 chin leh commercial vehicle tan kum 15 chinte chuan vehicle fitness test an kaltlang zel a ngai ang. India ramah kum 20 tling tawh hi nuai 51 leh kum 15 tling tawh hi nuai 34 a awm mek a, heng motor hluite hi hnawl an nih chuan motor khuin boruak bawlhhlawh a siam chu 25% vela a tlakhniam theih beisei a ni. 

Finance minister chuan kumin chhungin national highway, km 11,000-a thui siam zawh hman tum a ni tih a sawi. Kawngpui siam tur zingah km 3,500 hi Tamil Nadu state ami niin, Kerala-ah km 1,100, West Bengal-ah km 675 leh Assam-ah kum thum chhungin km 1,300 siam tum a ni. 

Kumina Assembly inthlan neihna tur West Bengal-a kawngpui siam leh cheiṭhatna atan sorkar laipui chuan Rs vbc 95,000 a ruahman. 

- Indian Railways tan Rs vbc 1,10,055 dah a ni a, heng zinga Rs vbc  1,07,100 chu capital expenditure atan ruahman a ni. 

- Defence budget atan Rs vbc nuai 4.78 dah a ni a, nikum budget aia a punna 7.34%  a ni. 

- Power sector tan Rs vbc nuai 3.05 dah a ni a, kum thum chhungin khawpui 100 chuang chu Gas distribution network-ah telh hman tum a ni. 

- Public sector bank tan Rs vbc 20,000 dah a ni. 

- Agriculture sector tan Rs vbc nuai 16.5 dah a ni.

- Digital mode of payment tihchangtlunna atan Rs vbc 1,500 ruahman a ni. 

- Rural infrastructure development atana sum dah chu Rs vcb 30,000 aṭangin Rs vbc 40,000-ah tihpun a ni. 

- Census neih tur atan Rs vcb 3,726 ruahman a ni a, census neih tur hi digital census hmasa ber tur a ni. 

- Swachh Bharat 2.0 tan kum 2021 aṭanga kum nga chhung atan Rs vbc  1,41,678 ruahman a ni a, urban area-a air pollution sutkianna turin urban centre 42 tan Rs vbc 2,217 ruahman a ni bawk. 

- Urban local body 4,378-a Jal Jeevan Mission kalpuina turin Rs vbc nuai 2.87 dah a ni. 

- Thil siamchhuahna lam tihchangtlunna turin producation linked incentive (PLI) scheme atan kum nga chhung atan Rs vbc nuai 1.97 dah a ni. 

- National Education Policy hnuaiah school 15,000 chuang thuam ṭhat leh tihchangtlun tum a ni. 

- Assembly inthlan neihna tur, Assam leh West Bengal-a tea worker-te tan special scheme siamin, hemi atan hian Rs vbc 1,000 ruahman a ni. 

Electronics item

Mobile

Charger

Leather shoe

Kabuli chana

Pulses

Urea

Auto parts 
Gems

Iron

Steel

Nylon clothes

Copper items

Insurance

Electricity

Steel utensils

Dry cleaning

Agricultural equipment