Thla 18 hmain J&K hruaitute chhuah an ni ang: Jitendra Singh

Minister of State for Prime Minister's Office Dr Jitendra Singh chuan Jammu and Kashmir-a politician hren mekte chu thla 18 aia hmaah an chhuah zalen vek dawn tih a sawi.

Jitendra Singh chuan thuthar thehdarhtute chuan J&K-a politician hren mekte chanchin an zawt reng tih sawiin, engtikah nge chhuah zalen an nih dawn tih an zawt ngun hle tih a sawi bawk. Chung mite hnenah chuan thla 18 hmain an chhuah vek dawn tia a chhan ṭhin thu a sawi a ni.

Pathianni khan Katra-a thu a sawinaah hemi chungchang hi a sawi a, Thawhlehni pawh khan media miten phone hmangin a thusawi chungchang hi zawtfiah lehin hetah pawh hian thla 18 aia tlemah chhuah an ni dawn tih a lo sawi leh bawk.

J&K special status Article 370 tihbo a nih aṭang khan state chhung politician eng emaw zat chu pawn chhuak thei loin an hreng nghal a ni.

Jammu and Kashmir Director General of Police Dilbagh Singh chuan J&K ramria firfiakte chetna chu la thleng reng mah se a ni telin a tlahniam ve hret hret reng tih a sawi.

Dilbagh Singh hian Thawhlehni khan Kishtwar tlawhin Police Control Room-a CCTV Monitoring System a hawng nghal a ni. Hetah hian thu sawiin Singh chuan ramria firfiakte chetna chu Police-te leh security force-te inpekna avangin an dolet zel thei tih a sawi a, nitin a tlahniam ve telh telh tih a sawi bawk.

Kishtwar-ah hian venhimna kalpui dan chungchang a enfiah nghal a, officer leh sipaite chu remna leh muanna a awm zel theihna tura ṭha taka an hna thawk turin a chah.