Rajnikanth-an Hindi zir luih tir duh lo

Union home minister Amit Shah-an India rama ṭawng pakhat, 'one nation, one language' hman chungchang a sawi chuan sawiseltu a neih bel zel a, megastar-turned-politician Rajnikanth pawhin Hindi chu hman luihtir an ni tur a ni lo, a ti. 

Veteran actor, Rajnikanth chuan ṭawng chungchangah tumah tihluihna hmanga hman luihtir tur a ni lo tiin, "Tamil Nadu chauh ni lo, chhim lam state dang­ah pawh Hindi hmantir tumna hi an pawm dawn lo," tiin a sawi. Hindi chauh ni lo, ṭawng dang pawh inhman luih tir tur a nih loh thu a sawi. 

Rajnikanth chuan ram pumah ṭawng pakhat hman chu inpumkhatna atan chuan thil ṭha tak ni mah se, India ram tan thil theih a ni lo a, tihluihna hman chu pawm theih a ni lo tih a sawi a ni. 'One nation, one lang­uage' chungchang hi DMK hot MK Stalin leh  All India Majlis-e-Ittehad-ul-Muslimeen (AIMIM) chief Asaduddin Owaisi pawhin na takin an lo sawisel tawh. Stalin chuan, "Hindu ṭawng in hman tir chung-chang hi kan lo sawisel fo tawh. Hetihlaia Amit Shah-a'n hetiang thu a rawn sawi leh hian ram inpumkhatna thlengin a nghawng pawi thei dawn a ni. A thusawi hi sut leh turin kan phut a ni," a ti. Hindi chu Indian zawng zawng 'mother tongue' a ni lo tih Owaisi chuan a sawi a, "India hi Hindi, Hindu, Hindutva tih aiin a lian zawk a ni," a ti.