Ram pumah NRC kalpui a ni dawn: Amit Shah
Union home minister Amit Shah chuan National Register of Citizens (NRC) chu Assam tan chauh a ni lo a, rampumah kalpui a nih dawn thu Nilaini khan a sawi.
Amit Shah chuan ramdang mi India ramchhunga dan loa awmte chu thawnchhuah an ni vek dawn tih a sawi bawk. Hindi daily Hindustan-in event-a buatsaiha thu a sawinaah Amit Shah chuan Hindi-a thu sawiin, "England, Netherland leh America-ah inbenbel tum ru, tuman an phalsak lo ang che u. Chutiang a nih si chuan engtin nge India-ah lo kalin inbenbel in tum bik? Tupawh lo kalin an cham reng thei em ni? Hetiang hi ram kalphung a ni lo. Register of Indian Citizen chu kan mamawh hmasak a ni. Kan election manifesto-ah pawh Assam-ah chauh ni lo, rampuma NRC kalpui kan tiam a ni. Midang ramchhunga dan loa awmte lakah chuan dan angin hremna kan lekkawh ang," tiin a sawi.
Shah chuan a duhthawh hle a, a hming pawh National Register of Citizens tih a ni a, National Register of Assam tih a ni lo, tiin a sawi zawm a ni.
Hindi hmang turin ka ti lo
Amit Shah chuan tunhnaia 'one nation, one language' chungchanga a thusawi, eptu lamin an sawiselna chu chhang letin, regional language aiah Hindi hmang turin a ti lui lo tih a sawi.
Shah chuan Hindi chu second language anga zir turin a ngen chauh a ni tih sawiin, a thusawi chu eptu party-te chuan politics zawngin an lo lalut a ni, a ti. Shah chuan, "Kei ngei pawh non-Hindi state Gujarat ami ka ni. Ṭawng chungchanga ka thusawi chu politics khelhna atan an lo hmang duh anih chuan, an duhthlanna a ni e," a ti.
September 14-a New Delhi-a National Hindi Day hmannaah Amit Shah hian Hindi chu India ram pumah common language a siam a ṭul thu a sawi a, he a thusawi hian sawizui a hlawh hle. A bikin chhim lam state-te chuan minister thusawi hi na taka sawiselin, Hindi ṭawng hmang tur chuan tumah intihluih theih a ni lo tih an sawi. Hindi chu Constitution in a ṭawng 21 a pawm zinga pakhat a nih thu leh, ṭawng dang a pawm 20 te nen an dinhmun pawh inang reng a nih thu sawiin, Hindi hman luih tir tumna chuan ram mipuite a ṭhendarh zawk dawn tih an sawi a ni.