NDRF-ah hmeichhiate dah ve tawh dawn

National Disaster Res­ponse Force (NDRF) batta­lion thar an dinah, hmei­chhiate chu dah an ni ve tawh dawn tih official-ten an sawi.

Sorkar laipui chuan nikum khan NDRF batta­lion-a hmeichhia dah ve tawh tur hian rawtna a lo siam tawh a ni. NDRF Director General S.N. Pradhan chuan, "A hma kha chuan hmeichhiate awmna tur barrack leh thil ṭul dang kan nei lo a, mahse tunah chuan kan nei tawh a, hmeichhiate hi NDRF battalion-ah hian kan dah chho zel dawn a ni," tiin a sawi.

NDRF hian ram pumah  battalion 12 an nei mek a, kumin hian NDRF battalion thar pali - Jammu and Kashmir, Himachal Pradesh, Uttarakhand leh National Capital Region-ah te hawn belh a ni. Battalion thar tinah hian sipai leh hnathawktu 1,150 an awm ṭheuh a, hengte hi Assam Rifles, Indo-Tibetan Border Police leh Border Security Force aṭangtea pawh pen an ni.   

"Sorkar laipui min ngenna angin kumin chhung hian NDRF battalion thar pali-ah hian, hmeichhia a tam thei ang ber awm tir a ni dawn a ni," tiin Pradhan chuan a sawi bawk. National Disaster Res­ponse Force (NDRF) hi Disas­ter Management Act, 2005 hmanga din a ni a, Minister of Home Affairs hnuaiah awmin, kum 2006 aṭanga kalpui a ni. NDRF hi specialised force an ni a, rikrum thila mipuite ṭanpui hna thawk ṭhintu an ni.