MP-in chhawmdawlna Rs vbc 11,906 dil

Madhya Pradesh sor­kar chuan an state-in tun­hnaia tuilian vanga chhiatna nasa tak an tawrhah chhawm­dawlna atan cheng vai­belchhe 11,906 pe turin sorkar laipui a dil. 

National Disaster Manage­ment Authority joint secretary Sandeep kaihhruai central team chuan Madhya Pradesh hi an tlawh a, tuilianin chhiatna a thlen dan te, state sorkarin harsatna tawkte chhanchhuah leh chhawmdawl hna a thawh dante an enfiah a ni. 

State official-te chuan central team hnenah hian ruahsur nasa leh tuilianin chhiatna a thlen dan hrang hrangte an lo hrilh a, mi 225 zetin nunna an chan thute an sawi a ni. Official-te chuan state chhunga district 52 zinga 36-ten tuilian hi an tawrh thu an sawi. 

Ruahsur nasa vang hian ram hectare nuai 24-a zaua thlai chinte a chhia a, hemi aṭanga sum hloh hi cheng vaibelchhe 9,600 zet a tling. Loneitute nuai 22 vel a nghawng tel bawk tih official-te chuan an sawi a ni. Ruahsur leh tuilianin kawng a tihchhiat chu cheng vaibelchhe 1,566 hu a ni tih an sawi bawk. 

Madhya Pradesh Principal Secretary (revenue) Manish Rastogi chuan state sorkarin tuilian tuarte hnenah State Disaster Response Fund (SDRF) aṭangin cheng vai­belchhe 125 a pe chhuak tawh tih central team a hrilh. Tuilenna hmun hrang hranga chhiatna thlen dante chu enfiah zui mek a nih thu leh, September 27-ah final report siam a, an sum hloh zat dik tak pawh hriat theih beisei a nih thu a sawi.