US-ah Prime Minister Modi a zin

Prime minister Narendra Modi chuan ni sarih cham turin nizan khan United States-ah a zin. 

US-a a cham chhung hian Modi hian Houston leh New York pawh a tlawh dawn a, United Nations General Assembly September 27-a neih turah thu a sawi bawk ang.

Foreign secretary Vijay Gokhale chuan ni 22 hian Indian community-te hmaah thu a sawi dawn tih sawiin, he hunah hian US president Donald Trump pawh a tel ve dawn tih a sawi. Ni 24 hian UN-a Mahatma Gandhi piancham kum 150-na puala hun hman turah pawh a tel dawn a, hetah hian South Korea President, Singapore, New Zealand, Bangladesh leh Jamaica Prime Minister-te pawh an tel dawn niin Gokhale chuan a sawi a, UN Secretary General pawh a tel dawn niin a sawi. Modi hian UN headquarters-a hian 50KW 'Gandhi Solar Park' a hawng nghal dawn a ni. India hian UN headquarters ah solar panel a pe a, hei hi headquarters inchungah dahin, panel pakhat hi UN member 193 zel tan dah a ni. 

Gandhi piancham lawmna puala hun hmanah hian solar park bakah 'Gandhi Peace Garden' pawh Modi hian a hawng nghal dawn bawk a, UN-in Gandhi puala special postage a siam chu tlangzarh a ni bawk ang. Modi hi US-ah hian Bill and Melinda Gates Foundation's Global Goalkeeper's Award hlan a ni dawn a, hei hi Swachh Bharat Abhiyan kaltlanga faina beihpui nasa taka a thlak vang a ni.