Nehru khan inkahhai puang lo se PoK hi a awm lo ang : Amit Shah

Union home minister leh BJP president ni bawk Amit Shah chuan nimin khan Cong­ress chu na taka beiin, India prime minister hmasa ber Jawaharlal Nehru khan hun lo takah inkahhai puang lo chu nise Pakistan-occupied Kashmir (PoK) hi a awm lo ang, a ti. 

Amit Shah chuan Nehru chu bei zuiin, Kashmir chu Sardar Patel khan buaipui zawk se a tih thu a sawi. Prime minister Narendra Modi-an huaisen taka Jammu and Kashmir special status Articles 370 leh 35A a paih chu fakin, Kashmir chungchanga Congress leh Nationalist Congress party (NCP)-te dinna chu a sawisel zui.

"Rahul Gandhi leh Sharad Pawar-te chuan Article 370 paih chu an thlawp leh thlawp loh an mite hnenah an hrilh tur a ni," a ti. Rahul Gandhi chuan Article 360 chu political issue a ni a ti a, kan tan chuan politics lam thil ni loin ram inpumkhatna zawk a ni. BJP chhuan thum zetin Kashmir tan an nun an hlan tawh a ni, a ti bawk.

Abdullahs leh Mehbooba Mufti-te pawh an hming sawi lang loa bei zuiin, Kashmir-a roreltu pathumte chuan an state chhungah anti-corruption bureau din an pha lo tih a sawi. Amit Shah chuan Kashmir-ah chuan buaina a awm lo tih sawiin, Article 370 paih a nih hnu khan silai mu pakhat pawh kahchhuah la ni lo tih a sawi bawk. 

Home minister Amit Shah hian nimin khan Mumbai-a rally neihnaah thu a sawi a ni.