Pawngsual case vangin BJP hruaitu Hindu puithiam nihna paih dawn

Union minister hlui leh BJP hruaitu Swami Chinmayanand chu law zirlai hmeichhia pawngsuala puh a nih vangin, Uttar Pradesh special team police-te chuan kar kal ta Zirtawpni khan an man.

Law zirlai hmeichhia hi pawng­sual a ni ngei em tih chu sorkar damdawi-inah medical test tir a nih hnuah finfiah a ni a, hemi hnu hian Chinmayanand hi police-te chuan an man zui ve nghal. Hindu puithiam thuneitu sang ber Akhil Bhartiya Akhara Parishad (ABAP)-te chuan hindu puithiam nihna dinhmun aṭangin Chinmayanand hi ban an tum thu an sawi nghal bawk. 

ABAP president Mahant Na­rendra Giri chuan, "Kar liam ta Inrinni khan Chinmayanand chung­chang avangin ABAP hruaitute chuan committtee kan nei a, hetah hian hindu puithiam nihna dinhmun aṭanga chawlh tir chu kan remti tlang ta a ni," a ti.

"October 10-ah ABAP general body meeting neih a ni dawn a, ABAP hruaitute thutlukna lo siam tawhsa chungchanga ngaihdan kan la khawm ang. Chinmayanand hian a thil tihsual hi a pawm thlap a, chuvang chuan court-in thiam a chantir hun hunah kan la lut leh ang," tiin Mahant Narendra Giri chuan a sawi bawk.

Kum 73 mi, Swami Chinma­yanand hi sakhaw lam leh politics-a hruaitu hlun a ni a, hnawhchhuah a nih chuan a hming hmaa "Swami" hi paih a ni ang. Uttar Pradesh state-a Shahja­hanpur khuaa Mumukshu Ashram-ah Chinmayanand hi man a ni a, judicial custody-ah ni 14 chhung kawl a ni ang. Kum 2011 khan Chin­mayanand hi hmeichhe pawng­sualah puh a lo ni tawh bawk a, hemi ṭum hian a chungah hrem­na lekkawh a ni lo.