Maha leh Haryana inthlan hun puang

Election Commission of India (ECI) chuan kar kal ta Inrinni khan Maharashtra leh Haryana assembly inthlan neih hun tur a puang. 

Press conference a neihah, CEC Sunil Arora chuan state pahniha inthlan neih hun atan October 21 ruat a nih thu leh, October 24-ah vote tlate chhiarin result puan a nih tur thu a sawi. Inthlan hun tur puan a nih tak avangin heng state pahnihah hian Inrinni aṭang khan Model Code of Conduct hman ṭan nghal a ni. 

Member 288 awmna, Maharashtra assembly term hi November 9 hian a tawp dawn a, member 90 awmna Haryana assembly term hi November 2-ah a tawp ang. CEC Arora chuan state pahnihah hian inthlanna thianghlim leh felfai tak kalpui a nih theihna turin theihtawp chhuah a ni dawn a, dik lo taka sum hmante veng turin banking channel-te pawh endik reng a ni dawn tih a sawi. Arora chuan Maharashtra-a special observer atan Indian Revenue Service (IRS) officer hlui Madhu Mahajan leh P Murli Kumar-te ruat a nih thu a sawi. Banking channel endik hna hi Income Tax Department-a financial intelligence unit-ten an thawk dawn a ni. 

EC chuan state pahniha airport-ah air intelligence unit dah turin Income Tax department-a Investigation Directorate chu ngen an nih thu a sawi a, inthlan vuakveta sum lakluh tumna pawh lo veng tur leh, a ṭul anga action la tura tih an ni, a ti.