Howdy, Modi! Trump-a'n PM Modi a fak

Houston, Texas, United States-a Pathianni-a rally buat­saih "Howdy, Modi!" event chu US president Donald Trump chuan hman puiin, 'hun chhin­chhiahtlak' a nih thu a sawi.

Trump chuan Texas-a 'Howdy, Modi!' event-a America ṭhian inpe leh inngaitlawm ber India prime minister Narendra Modi bula a tel thei chu a lawm thu sawiin, ram hruaitu pahnih inkai lai thlalak hian internet a luahkhat hneh hle.

He hunah hian Indian-American mi 50,000 vel zet pungkhawmin, ramdang miin US-a rally an buatsaiha tel an la tam ber ṭum nia chhal a ni bawk.

Prime minister Narendra Modi chuan Pathianni-a rally-ah hian thu sawiin, sorkar laipuiin Article 370 a tihbo chuan ram ṭhenkhat an ram thunun thei lo leh firfiak thlawpte a tibuai hle tih sawiin, hming sawilang si loin Pakistan a bei.

Modi chuan USA-in 9/11 inbeihna a tawh emaw, Mumbai 26/11 emawte lo chhuahna ram chu ram pakhat a nih thu sawi bawkin, firfiakte inchawm lenna hmun a ni, a ti bawk.

"India in kum 70-a upa dan a vailiam mek laiin, chu chu inlakhran duh pawl leh firfiakten an lo hmang ṭangkai ve mek bawk a ni," a ti. Firfiaka chetna leh firfiak chawisan duhna chu beihlet a hun tawh hle a, he inbeihnaah hian president Trump pawhin a dinna a tichiang hle a ni, tiin Trump-a'n a thlawp thu a sawi. "Mipuiin Howdy, Modi tia an sawi chuan, India-ah chuan engkim a ṭha vek e tiin ka chhang," a ti bawk. "Engkim a ṭha e" tih sawina atan hian Tamil leh Malayalam-te pawh a hmang nghe nghe a, danglamna chu inpumkhatna  anih thu sawiin, India democracy innghahna pawh kan danglamna hrang hrang hi a ni, a ti bawk.

Modi hian a thusawinaah hian Trump leh a chhungte chu India tlawh turin a sawm bawk a ni. Ni sarih cham tura US-a thang mek Narendra Modi hi UN General Assembly-ah pawh a tel nghal dawn a, US nen hian insumdawn tawnna kawngah pawh inbiakna an nei bawk ang.

'Howdy, Modi!' event hi minute 90 show a ni a, per­former 400 chuang zet a tel. Heng performer-te hian mipuite lo chawkhlimin hemi hnu hian Modi leh Trump hian stage an lawnkai a ni.

Modi hian minute 50 dawn zet thu a sawi leh a, Indian-American pungkhawmte hian a thusawi hi an lawm hle. Pungkhawm zingah India flag keng hmuh tur an tam hle a, Article 370 chungchang a sawilai phei chuan mipuite thawm a ṭha hle.