Sonia leh Manmohan Singh-ten P Chidambaram an tlawh

Congress party hotu Sonia Gandhi leh prime minister hlui Manmohan Singh-te chuan nimin zing khan Tihar Jail-a tang mek, union minister hlui P Chidambaram an tlawh. 

Union finance mi­nister hlui Chidambaram hi August 21 khan INX Media case-ah Central Bureau of Investigation (CBI) chuan manin, September 5 khan Tihar Jail-ah hian dah a ni. Kar kal ta Ningani khan Delhi court chuan judicial custody-a dah hun hi pawhsei lehin, October 3 thleng tantir a ni ang. 

Kum 74 mi, Chidam­baram hi finance minister a nih laiin a fapa, Karti Chidambaram-a com­pany-in hlawkna a hmuh theihna turin INX Media hnena dik lo taka clearance peah puh a ni a, hemi chungchang hi CBI leh Enforcement Directorate chuan an chhui mek a ni. 

Congress party chuan an party hruaitu puhna hi thu dik lo nia sawiin, politics hmanga beihna niah an ngaih thu an sawi. Chidambaram chuan Sonia Gandhi leh Manmohan Singh-ten an tlawh chu lawmawm a tih thu sawiin, Congress party chu chak leh huai taka a awm chhung chuan amah pawh chak leh huai takin a awm ve zel dawn tih a twitter-ah a ziak.