Pakistan firfiak 500-in India-ah luh an tum mek : Army Chief

Indian Army chief General Bipin Rawat chuan Pakistan chuan Balakot-a Jaishe-e-Mohammad launchpad chu a tuaithar leh tih sawiin, Pakistan firfiak 500 vel chuan India ramah rawh luh an tum leh mek a ni, a ti. 

Chennai-a thuthar theh­darhtute a kawmnaah, General Rawat chuan Indian Air Force (IAF)-ten an kahchhiat, Balakot-a launchpad chu tuaithar leh a ni tih sawiin, hei hian kumin kumtira IAF-te beihpui thlaknaah khan Balakot hi khawih fuh a ni ngei tih pawh a tichiang a ni, a ti.  Pakistan chuan India rama firfiak luhtir tumin Line of Control (LoC)-ah pawh inkahhai thuthlung a palzut fo a ni, tiin a sawi bawk. Hemi rual hian inkahhai palzut a nih chuan chhang let dan an thiam thu sawiin, sipaite chuan a ṭul anga hma lak dan an hre vek a ni, a ti. Theithawp chhuahin, ramri kana rawn luh tumte dan tumin an bei zel dawn tih a sawi. 

Kumin kumtir lama Pakistan firfiakten Jammu and Kashmir-a Pulwama-a CRPF convoy an beih avanga sipai 40 zet thihna thleng phuba lain, February 26 khan IAF Mirage 2000  jet eng emaw zat chu Pakistan ramah lutin, Balakot-a JeM camp chu an bomb a ni.