Thla 8 chhunga hri kai hmuhchhuah tlem ber ni thleng

India ramah Thawhlehni khan Covid-19 kai hmuh chhuah thar mi 8,635 an awm a, hei hi thla riat chhunga ni khata hri kai hmuh an tlem ber ni a ni. 

Hemi ni vek hian hripui vanga thi mi 94 awm bawkin, thla kua chhunga hri vanga ni khata thi 100 an tlin loh ṭum khatna a ni bawk. Hri kai hmuh tawh zingah vaibelchhe 1.04 chuang chu enkawl dam ni tawhin, ram pum huapa recovery rate hi 97.05% a tling tawh. Hripui thihpui zat, fatality rate pawh a tlahniam zel a, 1.43%  a ni a, hri thihpui zinga 70% chuang chu natna benvawn lo nei sa an ni. Hri kai enkawl mek pawh ni 14 chhung chu nuai hnih tling lo an ni tawh. 

Thla li liam ta aṭang khan state tam zawkah hri kai leh hripui thihpui hi an tlahniam zel a, hetih lai hian Kerala leh Maharashtra-ah erawh chuan an dinhmun a la ziaawm thei lo thung. Ram puma hri kai mek zinga 70% dawn chu heng state pahniha mite hi an ni. Hei vang hian sorkar laipui chuan heng state pahnihah hian high-level multi-disciplinary team a tir. Heng team-te hian tualchhung dinhmunte enfiahin, hri darh tur venna kawnga hmalak dan tur rawtna te siamin, state sorkar chu an thawhpui dawn a ni. 

Nimina Rajya Sabha rorel inkhawmah minister of state for health Ashwini Kumar chuan India rama Covid-19 hripui vanga thi zingah doctor 162, nurse 107 leh ASHA worker 44 an tel tih a sawi. Minister chuan hripui vanga healthcare worker thi zat a tarlan hi January 22 thlenga state hrang hrang report an dawn aṭangin a nih thu a sawi.