Loneituten Feb 6-ah 'chakka jam' huaihawt dawn

Loneitu pawl chuan farm law duh lohna lantira an nawrh huaihawtna kal zelah, February 6 hian ram pum huapin 'chakka jam' huaihawt an tum. Hemi ni hian darkar thum chhung chu national leh state highway-te an dang dawn a ni. 

Loneitu pawl hruaitute chuan Thawhṭanni khan Haryana lam, Singhu border-ah press conference neiin, February 6, chhun dar 1 leh chawhnu dar 3 inkar chhunga kawngpui dan an tum thu hi an puang. Chakka jam an huaihawt chhan ber tur chu nawr an huaihawtna, Delhi boder hrang hranga internet service tihtawp anih vang leh, thuneituten an chunga mawi lo taka an chet vangte a nih thu an sawi. 

Thawhṭannia union finance minister Nirmala Sitharaman-i'n union budget 2021-22 a pharhah, loneitute chu ngaihthah an nih thu loneitu pawlte chuan an sawi a, agriculture sector budget chu a tihniam a ni, an ti. Nawrh huaihawtna hmuna tui leh power supply-te tihtlemsak an nih bakah, mobile toilet block-te pawh lakbo a nih thu an sawi bawk. 

Nawrh huaihawtnaa a hmala tu ber, Samkyukt Kisan Morcha (SKM) chuan movement an kalpui mek kaihhnawih account tam tak chu Twitter-in a dan sak tih sawiin, heihi sorkarin a ngenna vang niin an sawi. Mimal, loneitu nawrh huaihawt mekte an thlawpna thu sawitu mi eng emaw zat account pawh hrek a nih thu an sawi bawk. Hetianga account dan sak an ni hi democracy beihna nia an ngaih thu an tarlang. 

SKM chuan police leh thuneituten loneitu nawrh huaihawt mekte an zarbuai leh hrekna te an tihtawp a, loneitu mante chhuah an nih hma chuan sorkar laipui chu inbiakna neihpui an tum lo tih an sawi. 

Sorkar leh a hnuaia police-te chuan kawng hrang hrangin nawrh huaihawt mekte hi an bei let a ni, an ti. January 26-a tractor rally neihnaa buaina chhuakah khan loneitu zinga tam tak leh an motor-te chu Delhi police-ten manin, mi eng emaw zat chu an chin hriat lohin an awm niin SKM chuan a sawi bawk.

Sorkar leh loneitu aiawhte hi ṭum eng emaw zat inbe tawh mah se, inremna an la siam thei lo. Sorkar chuan thla 18 chhung heng dan thar pathumte hi hman rih loh a rawt a, mashe hei hi loneitu lam chuan an pawm theih lo a, sut vek turin an phut a ni.  Loneitute hian farm law thar pathumte hi sut leh tura sorkar laipui phutin, Delhi border-ah hian thla hnih chuang nawrh an huaihawt tawh a ni.