PM Modi leh Amit Shah ten Bengal-ah rally nei dawn

West Bengal Chief Minister Mamata Banerjee-in an state khawpui, Kolkata-ah anti-BJP rally puitham tak a huaihawt hnuah, Prime Minister Narendra Modi leh BJP president Amit Shah-te chuan state chhung hmun hrang hrangah rally neih an tum. 

BJP hruaitute hian January 22 leh February 8 inkar hian rally ṭum eng emaw zat neih an tum a ni. 

State BJP president Dilip Ghosh chuan nimin khan Amit Shah hian a rally hmasa ber tur chu Malda district-ah a nei tih sawiin, vawin hian Birbhum district-a Jhargram leh sri-ah a nei leh dawn a, naktukah Amit Shah hian hman loh avangin union minister tu emaw ber chu Nadia district leh South 24 Parganas district-ah rally nei tur hian a sawm leh dawn bawk tih a sawi. 

Prime Minister Modi chuan Jnauary 28, Jnauary 31 leh February 8 hian Siliguru, Thakuragar leh Asansol-ahte rally a nei dawn bawk. January 19-a Mamata Banerjee-in rally a huaihawtna, Kolkata-a Brigade Parade Ground-ah PM rally hi buatsaih an tum a, mahse central lama an hruaituten inbuatsaihna hun a tlem tawh nia an ngaih avangin he hmunah hmun dangah an ruahman ta zawk tih Ghosh chuan a sawi. 

BJP chuan Lok Sabha inthlanpui awm turah Bengal-a seat 42 awmah seat 22 tal an lak an beisei thu an sawi. BJP hian tunah hian Lok Sabha MP hi pahnih an nei mek a ni.