NRC-ah tel lo mah se Hindu chu hnawhchhuah an ni lo ang - RSS chief

Rashtriya Swayamsevak Sangh (RSS) chief Mohan Bhagwat chuan National Register of Citizens (NRC) list-ah an hming tel lo mah se Hindu te chu India ram aṭangin hnawhchhuah an ni dawn lo tih a sawi. 

RSS hotu hian Kolkata-a RSS leh BJP ten closed door meeting an neihah he thu hi a sawi a ni. NRC hi Assam state-ah kalpui niin August 31 khan final list tihchhuah a ni a, list-ah hian mi nuai 19 chuang zet an tel lo a, list-a tello zinga tam tak chu Bengali Hindu an ni. 

Union home minister Amit Shah chuan NRC hi Assam-ah chauh ni lo, rampumah kalpui a ni dawn tih a lo sawi tawh bawk. Hetihlai hian West Bengal chief minister Mamata Banerjee-i chuan a kaihhruai sorkar chuan an state-ah NRC kalpui hi a remti ve dawn lo tih a sawi thung. Kar liamtaa Amit Shah nen an inkawm ṭum pawhin Banerjee chuan Assam-a NRC kalpui avanga India khua leh tui dik takten harsatna an tawh phah thu sawiin, hetiang dinhmun hi paltlang tir an ni tur a ni lo, a ti. 

RSS hian dan loa ramchhunga rawn lutte dapchhuah hna kalpui turin an campaign reng a, hemi rual hian Bangladesh, Pakistan leh Afghanistan aṭanga Muslim ni lo rawn pem lutte India khua leh tui nihna pek theihna tur, Citizenship Amendment Bill (CAB) chu ngaihtuah thuai turin an nawr reng bawk a ni. Kokalta-a inkhawm an neihah hian Parliament thlasik ṭhutkhawm neih hunah CAB hi ngaihtuah ngei se an duh thu an sawi.