Bank union-in nawrh an tum an ṭhulh

Bank union-te chuan Ningani aṭanga ni hnih awh nawrh huaihawt an tum chu an ṭhulh. 

Nimina Finance secretary Rajeev Kumar-an bank union hruaitute a hmuh hnuah, bank-ten nawrh huaihawt an tum chu ṭhulh a nih thu hi an puang a ni. 

Bank union hian nawrh an tumna chhan hi Finance Minister Nirmala Sitharaman-in August 30-a Public Sector Bank (PSB) 10 te bank 4-ah chhunfin/ zawm khawm a nih tur thu a puang vanga an duhlohna lan tir an tum vang a ni.

Ruahman lawk dan chuan Septem­ber 25 zan lai aṭanga 28 thleng nawrh hi huaihawt tum a ni a. Bank union pali te chu - All India Bank Officers Confederation (AIBOC), All India Bank Officers’ Association (AIBOA), Indian National Bank Officers’ Congress (INBOC) leh National Organisation of Bank Officers (NOBO)-te an ni.

Bank union hruaitute leh finance secretary  hian  PSB-te chhunfin tum chungchang bakah hian hlawh chungchang te, karkhata ni 5 chhung hnathawh hun siam leh cash transaction tih theih hun tih tlem chungchangte an sawi ho a ni. Rajeev Kumar-an an thilsawite ṭha taka a lo dawnsawn thu bank union-te chuan an sawi.

Kum 2017 khan sorkar laipui chuan State Bank of India leh Mahila Bank-te chu a lo zawm khawm tawh a, anni bakah hian Dena Bank, Vijaya Bank te chu Bank of Baroda-ah chhunfin an ni tawh bawk.