Nepal sorkarin India pawisa hman a khap

Prime Minister Narendra Modi-a'n India pawisa a tih thih nghawng kal zelah India ṭhenawm ram Nepal chuan India pawisa note 100 chin chunglam an ramah hman a khap. Nepal sorkar hmalakna hi India sorkarin pawisa a tih thih leh thut venthawn thila an tih niin tarlan a ni.

Pathianni kalta khan Nepal Rastra Bank chuan thuchhuah siamin Nepal-a khualzinte leh an ram mipuite chu India pawisa Rs 100 chin chunglam hmang lo turin thu a chah a ni. Nepal-a journalist lar tak Prashant Sharma chuan, "Nepal sorkar hmalakna hi chu inventhawn thilah an tih a ni ber a, kumin kum tawp lama Lok Sabha inthlan hmaa India sorkar pawisa note lian an tih thih leh thut an hlauhthawn vang a ni ber," tiin India pawisa note hman phal loh a nih chhan a sawi.

Nepal sorkar hmalakna hian sumdawng lian lote a nghawng nasa ber dawn niin tarlan a ni a, India sorkarin kum 2016-a pawisa a tih thih pawh khan India leh Nepal inrinnaa sumdawngte chu an buai phah hle. Nepal hi India nen sumdawnna kawngah an inkungkaih ṭha hle a, India pawisa note lian hman phal loh a nih takah chuan India leh Nepal sorkar indawrna pawh a nghawng nasat hle rin a ni bawk.