Bengal-ah NRC kalpui a ni ang

Bharitya Janatiya Party (BJP) state in-charge Kailash Vijayvargiya chuan nimin khan West Bengal-ah National Register of Citizens (NRC) kal­pui a ni dawn tih sawiin, Hindu-te erawh chuan India ram an chhuah­san a ngai dawn lo tih a sawi.

Kolkata-a hun an hmannaa thu a sawiah Vijayvargiya chuan, "BJP national general secretary ka nihna angin, National Register of Citizens kalpui a ni ang tih ka sawichiang duh a, mahse Hindu pakhat pawhin ram an chhuahsan a ngai lo ang. Hindu zawng zawng chu khua leh tui nihna pek an ni vek ang," a ti. 

West Bengal-a sorkarna siam mek Trinamool Congress chief Mamata Banerjee chuan Thawhṭanni khan TMC workers' convention-ah WBengal-ah NRC kalpui a ni ve dawn lo tih leh, mi paruk NRC kalpui hlauh vanga an thih tawh thu a sawi a, heti chung hian BJP state-in charge hian kalpui a nih dawn thu hi chiang takin a sawi thung a ni.

Mamata Banerjee chuan Assam-ah chuan Assam Accord vanga kalpui a ni a, ramchhung hmundangah chuan kalpui a ni ve dawn lo tih a sawi. NRC kalpui hlauh vang hian Bengal-ah hian Thawhṭanni thleng khan mi paruk an intihlum tawh a, Thawhlehni khan mi pahnih dang an intihlum leh nia sawi a ni.