MP-ah MiG-21 thlawhtheihna tla

Madhya Pradesh-a Gwalior-ah nimin zing khan Indian Air Force (IAF) thlawhtheihna, MiG-21 Tupe 69 trainer aircraft a tla a, mahse van­neihthlak takin pilot pahnihte chu him takin an invawrh chhuak hman a ni. 

Training mission neih laia thleng a ni a, MiG-21 hi Gwalior-a Maharjapur Air Force Station aṭanga thlawk chhuakin, zing lam dar 10 velah chesualin a tla a ni. MiG-21 tla hi IAF Tactics and Air Combat Development Establishment (TACDE) school tia sawi zinga mi a ni. 

IAF chuan thlawhtheihna chetsual chhan hi chhui chiang turin thupek a tichhuak nghal. IAF hian kumin chhungin thlawh­theihna 10 a hloh tawh. January 28 khan IAF Jaguar chu a tla a, February 1-ah Bengaluru-ah Mirage 200 a tla leh bawk. Heng thlawhtheihna pahnih tlaah hian pilot -te an thi ve ve a ni. February 12 khan Pokhran-ah MiG-27 a tla leh bawk a ni. 

2-19 Aiero India Show, Bengaluru-a neih hma lawkin IAF hawk jet pahnih chu boruaka insuin, pilot pakhat a thih bakah midang pahnihin hliam an tuar bawk. IAF hian kumin February 27-a Pakistan-a Balakot-a Jaish-e-Mohammed firfiak camp an beihnaah khan thlawhtheihna pahnih an chan bawk a ni. Hemi hnu March 8 khan MiG-21 Bison chu Bikaner bulah a tla leh a, March 31 khan Sirohi-ah MiG-27 UPG chu a lo bo tawh bawk. Arunachal Pradesh-a Antonov An-32 tlaah sipai 13 an thi leh a, August 31 khan Sukhoi Su-30MKI chu alo chesual leh bawk a ni.