Trump-a'n Modi hnenah Pak nena an inkar siamṭha turin ti
White House chuan thuchhuah a siamah, US president Donald Trump chuan prime minister Narendra Modi hnenah Pakistan nena an inkar boruak chhia siamṭha tura a tih bakah Kashmir mipuite nun nuam zawka nuntir tura a thutiamte tihlawhtling turin a ti tih a tarlang.
Donald Trump leh Narendra Modi hian Thawhlehni khan United Nations General Assembly karlakah meeting an nei a ni. Modi leh Trump hian May thlaa Modi thlan tlin leh a nih hnu khan meeting ṭum li zet an nei tawh a, Thawhlehni pawh khan minute 40 zet meeting neiin, ram pahnih inkara insumdawn tawnna chungchang leh Pakistan-a firfiak awmte nuaibo dan chung changte an sawi.
White House chuan Trump hian defence leh security lama thawhdunna ṭha zawk neih a remti tih an sawi a ni. Article 370 paih a nih aṭang khan India leh Pakistan inkar boruak hi a chhe zual hle a, Pakistan hian international level-ah hemi issue hi nasa taka vawrh a tum.
Ram pahnih hruaitute hian Afghanistan chungchang pawh an sawidun a, venhimna leh remna a awm theihna tura hmalak dan tur an rilrua awmte an sawidun a ni. Ram pahnih inkar boruak pawh ṭha taka a awm chhunzawm zel theihna tura thawhdunna tur chungchangte sawiin, Trump chuan US leh India chuan nasa zawka insumdawn tawnna an neih a pawimawh thu sawiin, zalen leh dik taka insumdawn tawnna neih a pawimawh thute pawh a sawi.