Kejriwal chenna kawtah BJP in nawrh huaihawt

Delhi chief minister Arvind Kejriwal-a'n Na­tional Register of Citizens (NRC) chung­changa Ma­nor Tiwari a sawi danah lungawi loin, nimin khan BJP worker-te chuan CM chenna in kawtah nawrh an huaihawt. 

BJP hruaitu leh MP, Manoj Tiwari hian Delhi-ah pawikhawihna thleng tam chungchangah pemlutte puhin, khua leh tui dik tak thliarna turin NRC chu kalpui a duh ve tho a sawi a ni. Dan loa lut mi tam tak chu pawikhawihna thlengah an inhnamhnawih fo a ni tiin, hemi chungchangah hian Kejriwal chu ngawirengah puhin, politics lama a dinhmun a chhiat phah hlaua ṭawngchhuak ngam lohah a puh. 

Kejriwal chuan Tiwari hi chhangin, NRC kalpui a, list siam a nih ve dawn chuan Bihar-a piang, Tiwari chuan Delhi chu a chhuahsan a ngai ang, tiin a sawi a ni. BJP chuan Delhi CM thusawi hi na taka sawiselin, an lungawi lohna an lantir zui nghal a, CM thusawi chu awmze nei lo a ni, an ti. Party worker pungkhawmte hian in hungna bang lawn liamte an tum a, BJP flag vaiin Kejriwal duh lohna thute an au rualpui bawk. Police chuan pungkhawmte hi hnawhdarh tumin water canon-te an hmang. Member eng emaw zat chu an man zui bawk a ni.