Amit Shah-a'n Devendra Fadnavis meeting neihpui Shiv Sena nena thawhdun leh dan ngaihtuah

Union home minister Amit Shah chuan nimin khan Maharashtra chief minister Devendra Fadnavis hmuin Maharashtra inthlan hmachhawn tur chungchang leh Shiv Sena thawhpui leh dan tur a sawipui.

Nimina meeting-ah hian BJP working president JP Nadda pawh a tel a, state-a hruaitu hlun tak tak Pankaja Munde, Sudhir Munghantiwar leh Girish Mahajan-te pawh an tel. NDTV chuan Fadnavis hian state inthlanah hian Shiv Sena thawhpui leh a duh niin an tarlang a, state BJP chief Chandrakant Patil erawh chuan Lok Sabha inthlana chiang taka hnehna an chan hnuah thawhpui nei loa mahnia din tlang a duh niin an tarlang bawk. BJP hian thawhpui nei loin hnehna an chan theih a ring a ni.

Amit Shah leh JP Nadda-te hian thutlukna erawh an la siam lo a, an siam thuai pawh rin a ni bawk. State-a seat 288 awmah BJP hian Shiv Sena hnenah hian seat 110 aia tam a pe phal lo nia tarlan niin, a tam berah 120 thleng chu an tlawh thei mai thei nia sawi a ni thung. Shiv Sena hian a zahve ve vea seat insem an phut emaw 120 aia tam emaw an phut a nih chuan BJP hian an thawhpuina hi an tihtawp rin a ni. BJP hian Sena hi seat 120-ah tal lungawi tura an thlem rin a ni thung.

Nilaini pawh khan Shiv Sena chief Uddhav Thackeray leh Devendra Fadnavis-te hian Navi Mumbai-ah hun an hmang dun a, hetah hian CM hian an thawhdunna chu a la ṭha reng a ni tih a sawi. Maharashtra hi October 21 hian an inthlang dawn a, October 25-ah vote chhiar a ni ang. Congress leh NCP chu an thawkdun dawn tih a chiang tawh a, seat 125 ve vea in­sem turin inremna siamin, a la bang chu party te zawkte tan an dah a ni.