Antigua aṭangin Mehul Choksi hnawhchhuah a ni ang : Gaston Browne

Punjab National Bank (PNB) sum tam tham tak tihchingpensaknaa inhnanhnawih, lunghlua sumdawng Mehul Choksi chu a tlanchhiatna, Antigua and Barbuda prime minister Gaston Browne chuan a case chu tihfel a nih hnuah an ram aṭangin hnawhchhuah a nih dawn thu a sawi. 

Lunghlu hmanga sumdawng hausa Choksi hi PNB pawisa cheng vaibelchhe 13,000 zet tichingpenah puh a ni a, a thu­buai ngaihtuah a nih hmain January 2018 khan Antigua-ah a tlanchhe hman a ni. PM Browne chuan, "Kan ram Antigua and Barbuda-ah hian heng mi bumhmang kawl hi a ṭulna ka hre lo a, kan ram tan a hlutna a awm hek lo. India thuneitute chu engtik lai pawhin kan rama awm mek Choksi hi interview nei turin an rawn kal thei reng. India palaite an lo kal duh a nih phawt chuan visa pawh a thlawn vekin kan tihsak thei a ni," a ti. 

Mehul Choksi chu India ram aṭanga a tlanchhiat hnuah Antigua and Barbuda ramah awmin, an ram mi nihna citizenship a nei a, mahse nikum vek khan Choksi citizenship pawh chu hlihsakin, India ramah thawn kir a ni dawn tih PM Browne chuan a sawi.

Nikum February thla khan PNB Mumbai branch aṭangin dik lo takin Hong Kong-a Allahabad Bank leh Axis Bank branch-te tan Letters of Undertaking (LoU) an lachhuak tih hriatchhuah a ni. He lehkha hmang hian Choksi, Nirav Modi leh midangte chuan dik lo takin cheng vaibelchhe 280.7 an lachhuak a ni. LoU hi Diamond R US, Solar Exports, Stellar Diamonds hminga siam a ni. 

Hetih lai hian PNB-a sum tihchingpen kaihhnawiha mawhphurtu bera puh, Nirav Modi leh Choksi-te hi thil dik lo thleng haichhuah a nih hma hian India ram chhuahsanin an bibo hman a ni. PNB-a thil thleng hi hriatchhuah a nih veleh Modi leh midang inhnamhnawiha puhte lakah Prevention of Money Laundering Act (PMLA) hnuaiah thubuai siamsak nghal an ni.