Indian Army Chief puhna vangin Pakistan-in a ram endik turin UNSC sawm
Pakistan chuan United Nations Security Council (UNSC) permanent member leh ram dangte pawh an rama firfiak camp awm nia sawi chungchang chu a hmuna kal a, endik turin a sawm.
Pakistan Acting Foreign Secretary Moazzam Ahmad Khan chuan UNSC permanent member (P5) ram pangaa Resident Ambassor-te hnenah tunhnaia Kashmir chungchanga vanga India leh Pakistan boruak inep dante a hrilhfiah.
"India-in Pakistan a puhna a dik loh zia a taka enfiah turin, Pakistan chuan firfiak camp nia sawite endik leh enfiah tura eng ram aṭanga kal pawh chu ṭha takin a lo thawhpui zel dawn a ni," a ti.
Hei hi tunhnaia Indian Army Chief General Bipin Rawat-a'n Pakistan-in Balakot-a firfiak camp a tuaithar leh nia a sawi chungchang an chhan letna kal zel a ni.
Kumin February thlaa Indian Air Force (IAF) ten Balakot, Pakistan-a Jaish-e-Mohammad (JeM) firfiak camp beiin, an kahchhiat sak nia an sawi hnuah, Pakistan chuan ramdang palai leh media mite chu thil awmdan dik tak enfiah turin a hmunah hian a lo kalpui tawh bawk.