Sharad Pawar-a'n ED office tlawh tum ṭhulh

Enforcement Directorate-in Maharashtra State Coo­perative Bank scam kaih­hnawihah thubuai a ziahluhah,  National Congress Party (NCP) hotu Sharad Pawar  hming pawh sawilan a ni a, mahse thu zawhfiah tur erawhin koh a la ni lo. 

ED in bank scam-a a hming a sawilan avang hian Pawar chuan Mumbai-a ED office chu tlawh a tum tih a sawi a, mahse ED hian ziakin office-a a kal kher a ngaih loh thu an hrilh niin a sawi. Nimin khan Pawar chuan Mumbai police  hotuin ED office chu tlawh lo tura a ngen avangin a kal tum pawh a ṭhulh ta tih a sawi. ED office kal a tum thu a lo sawi avang hian police-te chuan office kawtah punkhawm khapna thupek an lo siam nghal a ni. 

ED-in bank scam-a NCP hotu hming a sawilang tel hi eptu pawl hrang hrang chuan na takin an sawisel zui a, NCP worker-te pawhin nimin zing khan Mumbai-ah lungawi lohna an lantir nghal bawk. Eptu hruaitute chuan Maharashtra in assembly inthlan a hmachhawn dawn hnaihah hetianga NCP hotu puh a ni hi BJP sorkarin politics hmanga a beihna leh tihchhiat a tumna a ni, an ti. 

Bombay High Court thupek anga ED office-in bank sum tihchingpen kaih­hawihah Pawar  bakah a tupa, Ajit Pawar leh midang 70 lakah thubuai a ziaklut a ni. Mahse Pawar chuan hemi chungchangah hian ED aṭangin hriattirna engmah a la dawn loh thu leh, press statement aṭanga a hriat ve chauh thu a sawi. 

Pawar chuan October 21-a assembly inthlan an nei dawn a, hetihlaia ED rawn chet dan chu hriatthiam a har thu a sawi a, August 22 khan MNS hotu Raj Thackeray pawh sum tihchingpen kaih­hnawihah thu zawhfiah a lo ni tawh bawk a ni.