Naupang 63 thihna thleng vanga man Dr Kafeel Khan-a puhna titawp

Kum hnih liamtaa Uttar Pradesh-a Gora­kh pur-a Baba Raghav Das Medical College-a naupang 60 chuang zet thihna avanga man, pediatrician Dr Kafeel Ahmad Khan chu an puhnaah thiam lohna a nei lo nia sawiin, a thubuaite tihtawp a ni. 

Kum 2017 August 10 leh 11 khan sorkar hos­pital-ah hian naupang enkawl lai 63 zet chu an thi a, hei hi naupang ward-a oxygen supply tur tlakchham vang nia sawi a ni. He thila mawhphurtu bera puh chu Dr Khan hi niin, 2017 September 2 khan manin jail-ah dah a ni. Ani bakah damdawiina thawka midang pakua pawh thubuai siamsak an ni bawk. 

Kum 2018 April thla khan Dr Khan hi bail-a chhuah  a ni a, court chuan a thil tih sualah hian evidence an neih loh thu an tarlang. Senior IAS officer Himanshu Kumar chu Dr Khan-a thubuai chhui tura tih a ni a, kumin April khan a report chu state sorkarah a thehlut a ni.

Dr Khan chuan Ni­ngani khan an chhuina report page 15-na chung­chang sawi chhuakin, "Zawnga tuar ai ngauin a tuar an tih ang deuh kha ka ni e, thiam lohna ka neih engmah report-ah a awm loh thu tarlan a ni. Yogi Adityanath a sorkar chuan ngaihdam min dil rawhse," a ti. 

Report aṭanga a lan dan chuan Dr Khan chu nodal medical officer in charge a nih loh thu finfiah a ni a, he thil thleng leh a khaihhnawih ah hian engmah inhnam­hnawihna a neih loh thu pawh tarlan a ni.