E-cigarette khap chhunzawm dawn

Sorkar laipuiin e-cigarette hralh leh lakluh khapna thupek a tihchhuah chu duh loin Inrinni khan nawrh huaihawt a ni. 

Mi ṭhenkhatten meizial zukna 'vaper' chu khap aia dan mumal tak hnuaia khuahkhirhna siam zawk turin sorkar chu phut mah se, sorkar laipui chuan e-cigarette khapna a lo siam tawh chu ennawn a, siam danglam a tum lo tih a sawi. 

Sorkar laipui chuan e-cigarettes hi India-a lakluh leh ram pawn a zawrh chhuah a khap a, kum lama naupang zawkte tan e-cigarettes hi meizial pangngai ang thoin chuap tan a ṭhat loh thu an sawi bawk. Kar kal ta Inrinni khan khawpui paruk-ah e-cigarette khap duh lohna hi lantir a ni. Mahse a huaihawttu Asso­ciaton of Vapers India chuan nawrh huaihawtnaah hian kal an ṭha lo hle tih sawiin, police-ten an bitum zui an hlauh avangin an tel ṭha ngam lo niin a sawi. 

Sorkar lam chuan meizial zukna 'vaper' hian vaihlo tur ṭha lo ngawl veina a thlen theih thu an sawi. 'Vaper' hmanga meizu ṭhinte chuan cigarette-a vaihlo tur ṭha lo awm lak ata 'vaper' hian a ven thu an sawi ve thung. India-ah hian vaihlo leh a kaihhnawih vang hian kum tinin mihring 9,00,000 chuang an boral anga chhut a ni a, puitling zingah meizu hi mi mtd 106 an awm a, China dawta tam ber an ni.