October 2-ah India ODF-ah puang dawn
Prime minister Narendra Modi chuan Mahatma Gandhi piancham, October 2-ah hian India chu Open Defecation Free (ODF) ram a ni tih official takin a puang dawn.
Sabarmati Riverfront, Ahmedabad-a Mahatma Gandhi piancham kum 150-na lawmna hunah Narendra Modi hian thu a sawi dawn a, hetah hian official-in India chun ODF(pawn lama inthiarna awm lohna) ramah a puang dawn a ni. He hunah hian Sarpanchs 20,000 aia tam an ramchhung hmun hrang hrang aṭangin an kalkhawm ang.
Gujarat deputy chief minister Nitin Patel chuan hemi chungchang hi Ningani liam ta khan Gandhinagar-ah a sawi. Patel chuan Sarpanch 20,000 zinga 10,000 vel zet hi chu Gujarat mi an nih dawn thu sawiin, Uttar Pradesh, Maharashtra, Rajasthan, Madhya Pradesh, Chhattisgarh, Punjab, Haryana, Bihar leh hmundang aṭang pawhin he hun hmang tur hian an kalkhawm dawn tih a sawi a ni.