Gandhi pianchamah Jail tangte eng emaw zat chhuah dawn

India hnampa, Mahatma Gandhi pian champha pualin October 2 hian, pawngsual, tualthah leh eiruk thubuai neite huam tel loin, mi tang 100 chuang sorkar chuan a chhuah dawn thu official-te chuan an sawi.

Union Home Ministry chuan state sorkar leh union territory thuneitute rawn chungin final list a tichhuak a, tang chhuah tura tih hi mi 600 bawr vel an ni. Amnesty scheme hnuaia special remission kaltlangin Jail tangte hi chhuahtir an ni dawn a, hmeichhia kum 55 chin chunglam, an tan hun zahve hmang zo tawhte chu chhuah an ni dawn a, anni bakah hian mipa kum 60 chin chunglam an tan hun zahve hmang zo tawhte chu chhuah an ni bawk ang.

Heng bakah hian Transgender kum 55 leh a chunglam, an tan hun zahve hmang zo tawhte leh, medical test aṭanga 70% mi an lohna nei, an thubuai zahve hmang zo tawhte pawh chhuah tur zingah an tel. Dam chhung tang tur leh thi tura tihte chu Jail aṭanga chhuah tur zingah hian an telve lo. Anni bakah hian Prevention of Corruption Act, The Terrorist and Disruptive Activities (Prevention) Act, 1985 (TADA), The Prevention of Terrorism Act, 2002 (POTA), Unlawful Activities (Prevention) Act, 1967 (UAPA), The Protection of Children from Sexual Offences Act, 2012 (POCSO), Prevention of Money Laundering Act, 2002, Foreign Exchange Management Act, 1999 (FEMA), Black Money (Undisclosed Foreign Income and Assets) leh Imposition of Tax Act, 2015 hnuai thubuai neite chu chhuah an ni ve dawn lo. 

Amnesty scheme hnuaiah tho hian nikum Ocotober 2 leh kumin April 6 khan Jail tang mi 1424-te chhuah an lo ni tawh bawk.