Parliament-ah loneitute chungchang Darkar 15 chhung sawiho remti
Parliament session neih mekah farm law thar duh lohna lantira loneitute nawrh huaihawt mek chungchang chuan hmun a luah nasa hle a, eptuten na taka an nawr hnuah sorkar laipui chuan nimin khan loneitute chungchang hi Rajya Sabha-ah darkar 15 chhung sawiho a remti.
Loneitute nawrh huaihawt mek chungchang sawiho a nih theihna atan Rajya Sabha-ah ni hnih chhung Question Hour ṭhulh a ni dawn a, private member bill pawh Inrinni hian pharh a ni lo bawk ang. Nimina Rajya Sabha inkhawmah eptu party 16-te chuan farmer protest chungchang bik hi darkar nga tal sawiho an phut a, sorkar chuan hei hi hi remtiin, darkar 15 zawkah a tipung a ni. Minister for Parliamentary Affaris Pralhad Joshi chuan sawhona tura hun hman an remtih zat chungchang hi a puang a ni.
Kum 2020 November 26 aṭang khan ram chhung hmun hrang hrang aṭanga kalkhawm, loneitute chuan Delhi border-ah sorkar laipuiin farm law pathum a siam thar duh lohna lantirin nawrh an huaihawt tawh a ni. Inremna siam tumin loneitu pawl aiawh leh sorkar hi ṭum eng emaw zat inbe tawh mah se inremna an la siam thei lo. Sorkar chuan dan siam tharte hi loneituten duh dan anga siamṭhat a inhuam thu a sawi a, mahse loneitu lam hian heng dante hi siamṭha lo a, sut vek an phut thung a ni.
Sorkar laipui chuan farm law hi thla 18 chhung hman rih loh a, hemi chhunga loneitute nen inremna siam dan kawng zawn a rawt leh a, mahse hei pawh hi loneitu lam chuan an hnawlsak leh bawk. Loneitute chuan an thil phut nawrna atan leh, Delhi border-a an nawrh huaihawtna hmuna internet service tihtawpsak leh, tui leh power supply tihtlem sak an nih avanga lungawi lohna lantir nan, vawiin hian ram pumah national leh state highway-te chu darkar thum chhung dan an tum thu an sawi.
British rorel laiin farm law sut a ni tawh : Ghuam Nabi Azad
Rajya Sabha-a leader of opposition, Congress hruaitu Ghulam Nabi Azad chuan prime miniter Narendra Modi hnenah farm law pathumte chu sut turin a phut a, "British rorel lai pawh hian an dan siam ngei, farm law chu an lo sut ve tawh tho a ni," a ti.
Azad chuan PM Modi hnenah January 26-a Delhi khawpui chhunga loneituten tractor rally an neihnaa buaina chhuah hnua chin hriat loha awm, loneitute ngaihven zui tur committee din turin a ngen bawk.