Actor Deep Sidhu awmna hrilh theih tan lawmman siam

Delhi police-te chuan January 26-a Red Fort complex-a buaina chhuak chungchang chu an la chhui zawm zel a, nimin khan buaina chhuahnaa mawhphurtu zinga puh, Punjabi actor-activist Deep Sidhu leh midang pathumte awmna chin hrilh theih hnenah lawmman a siam. 

Police-te chuan Sidhu leh midang pathum, Jugraj Singh, Gurjot Singh leh Gurjant Singh-te man an nih theihna atana an chin hrilh theih tan lawmman, Rs nuai khat an pek tur thu an chhuah. Hei bakah hian buaina chhuaka inhnamhnawiha Jajbir Singh, Buta Singh, Sukhdev Singh leh Iqbal Singh-te awmna hrilh thei hnenah Rs 50,000 zel pek an ni bawk ang. 

Loneituten tractor rally an neihnaa buaina chhuak vang hian Delhi police-te chuan mi 122 an man tawh a, thubuai 44 an ziak lut tawh bawk. Thubuai ziahluhah hian loneitu pawl hruaitu eng emaw zat hming ziah lan an ni. Delhi police-te crime branch chuan forensic team puihnain buaina chhuaka mawhphurtute chhui hna hi an thawk mek a, video hrang hrangte lakhawmin tractor rally neihnaa tiang leh hmanraw dang keng, buaina chawk chhuaktu zinga ngaih mi 12 chu an hre tawh tih sawiin, heng mite hi man tuma zawn mek an ni.