DRDO-in Aero India Show buatsaih

Defence Research and Deve­lopment Organisation (DRDO) chuan Air Force Station Yelahanka, Bengaluru-ah ni thum awh tur, Aero India Show vawi 13-na chu nimin aṭang khan a buatsaih. 

Air show hi defence minister Rajnath Singh-a'n a hawng a, exhibitor 610 - Indian 523 leh ram dang 14 aṭangin 78 an tel a, DRDO chuan defence technology thar ber ber a pholang bawk ang. Product, innovation leh technology 300 chuang pho lan an ni dawn a ni. 

Show hawnni hian sorkar laipui chuan state-run aerospace giant Hindustan Aeronautics Limited (HAL) nena Rs vbc 48,000 contract deal an siam chu a tifel a, hei hi India defence contract lian ber a ni. Ram chhunga siam, fighter jet LCA Tejas 83 leina tura contract an siam hi Defence Minister enpuina hnuaiah an ziakfel a ni.

Rajnath Singh chuan kum 7/8 chhunga sipai thuam chak leh ṭhatna turin sorkar chuan US dollar tluklehdingawn 130 a ruahman thu sawiin, foreign sector lam tan pawh an inhawn thu a sawi.  Singh chuan show tawp ni, February 5 hian thawhdunna tur inremna 200 chuang ziah hman beisei a ni thu a sawi bawk.