Parliament in hnihah Triple talaq bill pass

Triple Talaq bill chu Thawhlehni khan Parliament upper house, Rajya Sabha-ah pass a ni ve leh a, vote laknaah bill thlawp lamah vote 99 tlain a duh lo lamah vote 84 a tla. Kar hmasa khan  lower house, Lok Sabha-ah voice vote hmangin pass a lo ni tawh bawk. 

Muslim mipaten an nupuite hmaa talaq tih vawi thum sawi a, awlsam taka an ṭhen theihna hnawlna tur, Muslim Women (Protection of Rights on Marriage) Bill, Triple Talaq bill tia sawi hi pass a nih hma hian Rajya Sabha-ah sawiho a ni. Eptu party lam chuan he bill hi an dodal a, parliament committee-ah enfiah leh phawt an duh thu an sawi. 

Bill pass dawn hian BJP thawhpui JD(U) leh AIADMK-te chu house aṭangin an chhuak tau a, mahse BJP puihnain Rajya Sabha-ah hian pass a ni ta tho a ni. BJP chuan he bill hi hmeichhia leh mipate intluktlanna duh vanga pharh an ni tih an sawi a, pass a ni ta chu hnehna ropui tak a nih thu an sawi. He bill hmang hian Muslim hmeichhaite lakah dik lo taka thiltih ṭhin chu siamṭhat a ni dawn a ni, an ti. Prime minister Narendra Modi chuan bill pass a nih theihna tura puitu party leh MP-te chungah lawmthu a sawi bawk. 

Hetih lai hian Congress lam chuan bill an pass chu thil tihsual lian tak a ni tih a sawi thung. Bill chu an thlawp reng a, mahse he dan hi Supreme Court  pawhin a lo hnawl tawh a, dan hmangin triple talaq chu hnawl a nih tawh tho avangin a hmangtu chu thil tisualtu ang hrima lanchhuah tir kher chu a ṭul ber loa an hriat thu an sawi. Congress senior leader Raj Babbar chuan civil law chu criminal law-ah chantir a ni a, hei hi thil tihsual lian tak a ni, a ti.

Triple talaq bill hi thla 16 kal ta chhung khan Lok Sabha-ah ṭum thum ngawt pawm a ni hman a, a ṭum thumnaah hi chuan Rajya Sabha-ah pawh pawm a ni ve leh ta a ni.