BJP MLA Kuldeep Sengar tualthah thubuai siamsak

Central Bureau of Investigation (CBI) chuan nimin khan Unnao pawngsual thubuai kal zelah BJP MLA Kuldeep Sengar leh midang 10 lakah tualthah thubuai a ziaklut. 

Kum 2017-a Unnao-a hmeichhe kum tling lo pawngsualtuah BJP MLA Sengar hi puh a ni tawh a, hei vang hian party aṭangin suspend a lo ni tawh bawk. Nikum April thla khan man ni mah se bail-in a chhuak leh nghal a, tun thlengin a thubuai hi ngaihtuah a la ni lo. Sengar leh a ṭhuihruaite chuan pawngsual tawktu chhungte hi vauin, thubuai an thehluh chu an hnuhkir loh chuan an chhungkaw puma thahah an vau a ni. 

Pathianni khan pawngsual tawktu leh a chhungte chuanna motor chu Rae Bareli-ah truck chak taka tlanin a su a, a hmunah hian mi pahnih an thi. Pawngsual tawktu leh a lawyer pawh na takin an hliam bawk. Truck neitu leh driver hi man nghal an ni.

He thil thleng chungchangah hian pawngsual tawktu pu chuan FIR a thehlut a, Uttar Pradesh police-ten an chhui hnuin, Thawhlehni khan CBI kutah hlan a ni. CBI chuan nimin khan Sengar leh midang 10-te lakah tualthah thubuai ziak lut nghalin, Rae Bareli-a police station official-te pawh an hmu dawn.